المباني

((بسم الله الرحمن الرحيم ))

اليوم جبتلكم شعر المباني
واتمنى يعجبكم
نبدأ
__________________________________________________________________________________________
جابك الله من فراق ضيق صدور المباني ...
قبل لا الوحشه تزعزع بيتك الصلب وتبيده
بيتك اللي من رحلت وكل جدرانه تعاني ...
ما تحمل ينتظر شهرين وعيونك بعيده
الله العالم لو انك جيت متأخر ثواني ...
ما تشوف إلا بقايا من حصاه ومن حديده
من عرفتك وانت ضايع من مواني لي مواني ...
وتارك قلبي مولع من وقيده لي وقيده
ضاع عمري بس أحد بهالليالي واتحداني...
وانت لا تشبع غياب ولا تخاف من النقيده
ودي أتحمد لك الله بالسلامه ما مداني ...
كل ما توصل برحله ترجع برحله جديده
دام تدري كل وجه غير وجه الله فاني ...
ياخي اكسب لك ثواب وخاف ربك في عبيده
كان فيني عيب..قلي فيني العيب الفلاني ...
كان هرجي مزعلك في شي..قلي:لا تعيده
عيب تصغر في عيوني وأنت برقاب الغواني..
ليه تستسهل طعوني وأنت خابرني وليده
لعنبوك إن مت بيدك وش يفكك من خواني ...
لا احزنوا ربعي على فرقاي شللي تستفيده
انت منته اللي عشقته..انت اكيد إنسان ثاني! ...
كيف صرت بهالبرود وبهالأحاسيس البليده
وين حبك للزعل وين العناد الأولاني؟ ...
وين حنية زمان وفرحة العمر الرغيده؟
وين ذاك اللي ليا اقبل ما يبات الا بأماني ؟...
وين راح اللي ليا اقفى ما يروح الا فقيده؟؟

واحد من جابه الله بس يامر ويعصاني...
الوحيد اللي أخافه زعله وامشي معه سيده
ما بغيت أطيح بيده لين ما ربي بلاني...
والا انا لو هي بكيفي ما بغيت أطيح بيده
ذاك بس اللي ليا من شفته يلخبط كياني ...
أللي بنظره ينشف دم قلبي في وريده
قبل أشوفه اجمع له أحلى القصايد والمعاني ...
وان لقيته ما عرفت اقول لي جمله مفيده!!
ألف مره قبله أعد القصيده من لساني ...
ولعنبوه إن جيت عنده قمت اخربط بالقصيده
أمدحه وأنا ادري انه لو تباطاني نساني ...
انطحه وأنا اعرفه مجنون وأفكاره عنيده
من يسوي بي سواتك يالرهيف الأسمراني ...
منهو من الناس غيرك غلطته ترفع رصيده
من يقص جناح طيرك وانت اعز إنسان جاني ...
كيف أخاف رماح غيرك وانت طعناتك سديده
إن تبعتك اتبعك من طيبي وواسع بطاني ...
والا انا لا جيت اكيد إنسان تدري كيف أكيده
اقدر انزع ثيابي وألبسلك ثياب الأناني ...
واقدر اطلع من عذابي والعب بدورك وأجيده
ومستعد اكسب رهاني لو بغيت اكسب رهاني...
وأخدعك بإحساس كاذب وأتحدى من يصيده
ابك انا لا شفت خلي حط غيري في مكاني ...
والله اني لا تركه واصد واعشق سيد سيده
جيت ما أبيك تحقرني..جيت أبيك تعز شاني ...
جيت ابي فزعة ضلوعك من مشاعرك البليده
خلني داخل حدودك, واجبر بخاطر زماني ...
اكذب في باقي وعودك, وأصدق بلحظه سعيده


انتشلني من برودك, لو تولع بالمحاني ...
عطني احساس بوجودك, وخذ كل اللي تريده
تكفى واليا قلت تكفى بيع خلق الله عشاني ...
لا تضيع من يديني فرصة العمر الوحيده
يعلم الله شفت منك ومن غيابك ما كفاني ...
كان ما تقدر تخفف هم قلبي.. لا تزيده
شف غيابك وش مسوي بالصدور وفي المباني ...
وانت تدري كيف كانت صدمة غيابك شديده
يعلم الله لو وصلت البيت متأخر ثواني..
ما تشوف إلا بقايا من حصاه ومن حديده
__________________________________________________________________________________________
هاا كيف الشعر حلو ولا لأ
لا تنسو الردود
تقبلو مروري
(((سندريلا )))